سؤال دايمًا بسأله لنفسي لما الاقي نفسي لوحدي في اتجاه وباقي البشر في اتجاه تاني خالص.. هو أنا صح؟
دايمًا بتسيطر عليا ثقافة القطيع وهوب الاقيني مشيت مع الناس.. ومبتعلمش دايمًا من الموقف اللي حصل معايا لما كنت في ابتدائي وكان عندنا حصة فاضية والمدرس قالنا روحوا 2/1 كل العيال جريت علي 2/3 وانا الوحيد اللي جريت علي 2/1 الغريب بقي اني بعد ما روحت رجعت تاني ومشيت مع العيال رغم ان المدرس جه زعق بعد كده..
عمري ما اتعلمت الدرس ده ودايمًا أرجع في كل مرة رغم اني ببقي واثق ان طريقي صح.
تغيرات كتيرة مكنتش عاوزها حصلت في حياتي بسبب القرارات دي، ومحدش بيضربني علي إيدي كله علي عينك يا تاجر وبيبقي قراري بتاعي كده.
دي حاجة غريبة عندي مش عارف عند باقي الناس ولا لأ
تاني حاجة غريبة برضه بتحصلي هي أفكاري اللي بلاقيها بتتنفذ بس مش انا اللي بنفذها.
أقعد مع الشخص من دول أقوله فكرة مشروع بحلم بيه فكرة حاجة عاوز انفذها.. بس مش عارف لأي سبب من الأسباب أو بحاول أنفذها بس في عوائق .. شوية ألاقيه عملها ونجحت..
تفتكروا كانت هتنجح لو أنا اللي كنت نفذتها.
تالت حاجة غريبة
ليه دايمًا في رمضان رغم إن الشياطين بتسلسل كل الأفكار الغريبة والغير عادية بتيجي، ليه الدنيا بتبقي سهلة وتلاقي قدامك كل الحاجات الحرام سهلة ودماغك بتفكر في حاجات غريبة.
هي النفس بتاعتنا وحشة للدرجة دي، الشياطين كانت محجماها ولا إيه ولما اتسلسلت بقي خدت راحتها واتفردت..
دي شوية حاجات غريبة محيراني
